Tasalah Maharu Kupi

(ilustrasi: Dicky Hanafi)

Oleh: Saiba

SALAWAS baisian tipi hanyar, rumah Julak Laki rami tarus. Banyak kakawanan bubuhan kampung umpat manuntun. Jangankan film, acara Kelompencapir di TVRI haja gin asa rami bangat.

Pas arian tu, matan imbah Asar hampai ka malam hujan haja kada bataduhan. Pinanya pacang kadada urang nang manuntun tipi malam ni, bisa tasimbukut di pulau kapuk barataan umatnya.

Himung Julak Bini. Dalam hati sidin,”Kawa am acayan malam ni, hehehe. Salawas batipi hanyar, kada tapi kaubar bacicintaan wan abahnya,” kukunjihing Julak Bini.

Sakalinya luput tangguhan Julak Bini. Babaya handak bakintup ka paguringan, datangan Kai Usup wan Kai adul.

Kai Usup urang Hilir badahulu datang. Batapihan ha, ajin kada basalawar simpak tu. Tuha urangnya, ba’aksi kada bisa, sisingut alahan pada akar kariwaya, barumbai, sian kada kalihatan lagi muntung nang kilum.

Imbah tu datang Kai Adul. Sidin ni hanyar kamatian bini, hanyar imbah manujuh hari arian samalam. Ujar sidin, hawai di rumah.

Kabalujuran malam tu ti acara main bal di tipi. Hanyar bamula, Kai Adul hudah am kuciak-kuciak. Kai Usup ranai ha. Pisinnya urang tuha tu kadinginan, pina mangarisut sisingut sidin.

BACA JUGA :  Tapih Sakti Umbuy

Julak Laki mangiyau wan Julak Bini inta ulahakan kupi. Kada sa’apa, babulik Julak Bini. ”Kupi habis, Abahnya ai. Tukar hulu ka warung Acil Basnah,” ujar sidin.

“sudah ku tukar ti sa rai,” Julak Laki manyahuti. ”Cuba hahar di salawar panjang ku nang bagantung di kamar atawa mun kadada disitu, ba’andak diatas lamari,”.

Mangalunyur Julak Bini ka kamar. Imbah tu kaluar mambawa 3 bungkus kupi, tarus ka padu. Kalintingan sinduk Julak Bini maharu kupi. Kada lawas, kaluar sidin mambawa 3 galas kupi.

Asing-asingnya bubuhan urang tuha tu tadi ma’ambil sagalas saurang. Sruuuppp, langsung dikinum kada bagaduh bibir satangah luyuh. Kai Adul haja satangah galas sakali taguk.

Rahatan raramiannya manuntun main bal, Kai Usup manggalunyur bulik. Ujah ti handak bakamih.

Julak Laki pina asa ubah awak. Paluh kaluaran, dada ligup-ligup maka tangan satumat pina manjapai ka bawah ingkang.

BACA JUGA :  Salingkuh

Kai Adul pina kada karuan rasa jua. Hintadi duduk basila, imbah tu bajungkung, kada sa’apa pina kusur-kusur kaya kamimiyangan. Kada lawas, mamparapas sidin bulik padahal hujan balabat.

“Ui Umanya, kupi napa nang pian ulah tadi. Asa lain pada biasa,” Julak Laki masuk ka kamar mandatangi Julak Bini nang sudah takalapan di kaguringan.

”Kupi nang di laci Abahnya ai. Ulun ti kada tadapat mancari’i kupi nang di kantung salawar pian. Pas ulun lihat ada kupi di dalam laci, ulun ambil ai,” ujar Julak Bini sambil manguliat.

Takajut Julak Laki mandangar. ”Pian tahu lah Umanya, kupi nangapa nintuh?” ujar sidin sambil manciling.

”Kada tahu,” ujar Julak Bini.

”Nintu kupi supaya kuat gagah pakakas, Umanya aiiiiii…!!!” bakuciak Julak Laki sambil baluncat ka tilam.

Hujan magun ai labat. Lawang luar baluman dikunci imbah Kai Usup wan Kai Adul tadi bulikan. Julak Bini handak ka luar kamar, handak mangunci lawang tapi ditarik Julak Laki.

BACA JUGA :  Iguana

“Kaina haja urusan mangunci lawang tu,” Julak Laki pina kasasahangan imbah tanginum kupi tu tadi.

”Homa ai pian nih, diganang kawan pian nang badua tadi. Kaya apa nasipnya,” ujar Julak Bini.

”Astaga, banaran lih!” batapak kapala am Julak Laki. (ra)

Kamus:

  • Maharu = Mengaduk (menyeduh)
  • Matan = dari
  • Tasimbukut = Meringkuk (kedinginan)
  • Kunjihing; Kukunjihing; Takunjihing = Senyum simpul; senyum-senyum kecil; tersenyum simpul
  • Babaya = Saat akan/hendak
  • Bakintup = Masuk ke dalam
  • Sisingut = Kumis
  • Kariwaya = Pohon beringin
  • Kilum = Ompong
  • Hawai = Sepi
  • Kabalujuran = Kebetulan
  • Main bal = Sepak bola
  • Mangarisut = Mengerusut/mengkerut
  • Rai = Hitungan satu renteng
  • Hahar = Raba
  • Manggalunyur = Langsung pergi
  • Padu = Ruang dapur
  • Kalintingan = Suara sendok saat mengaduk sesuatu di dalam gelas
  • Rahatan = Saat/sedang/ketika
  • Ingkang = Selangkangan
  • Hintadi = Tadinya
  • Bajungkung (Banjar Pahuluan); badungkung (Banjar Kuala) = Jongkok
  • Kamimiyangan = Rasa gatal yang sangat
  • Mamparapas = Langsung pergi dengan berlari
  • Manciling = Mendelik
  • Magun = Masih
  • Kasasahangan = Sangat ingin (berhubungan dengan perasaan); tergila-gila

Saiba, tinggal di Barabai

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Dinilai Kurang Representatif, Pemko Banjarmasin Rencanakan Revitalisasi KBM Jahri Saleh

Kam Apr 18 , 2024
“Lokasi KBM Jahri Saleh dinilai kurang representatif karena berada di tengah pemukiman warga dan dari kegiatannya menghasilkan polusi suara serta limbah”

You May Like

TABIRklip