Tapih Sakti Umbuy

(ilustrasi: dicky hanafi)

Oleh: Norsiwan

DI PASAR iwak, Umbuy ni tamasuk nang ditakutani urang. Kanapa jadi ditakutani? Kaya ini kisahnya.

Bahari, wayah panambayan umpat bajualan iwak, Umbuy suah tahual lawan tacut di pasar iwak nang katuju mainta’i duit wan bubuhan paiwakan. Alasannya sutil banar, sagan cuk ka amanan.

Singkat kisah singkat carita, arian tu ti hampai lah tacut pasar ka wadah jualan Umbuy.

“Mana nih, cuk ka amanan?” ujah tacut pasar managih sambil kisah malarap sisingut lawan lading hirdir.

“Baluman kulihan duit. Hanyar baurak nah, dada payu satuyuk-tuyuk lagi,” ujah Umbuy manyahuti. 

Manciling mata tacut pasar kada dibari duit. Salian jua, Umbuy tu ti dicilingi kadada pina takutan, magin manggarunum sidin.

“Mun ikam handak lakas kulihan duit, daham satanai-tanai damiya, tuh umpat ma ambil upah ma angkat pati iwak kah,” ujah Umbuy pulang sambil manunjuk ka urang nang rahatan mamuat iwak ka mutur.

BACA JUGA :  Tasalah Maharu Kupi

Marasa pina dipahawai, lalu sarik ai tacut pasar tu tadi. Bamamai si tacut sambil basisipak ka jualan Umbuy. 

Lamunnya urang sapalih, karihit tu pang paparutan dimamai tacut pasar. Tapi Umbuy dasar lain urangnya, umpat jua sidin sarik.

Malihat jualan tahambur, lalu badiri ai sidin sambil mamacul tangkuluk tapih di kapala. Bakuciak Umbuy kasasarikan.

”Kabubungulan ikam ni ti, wani banar wan diaku. Kada tahu wan diaku ikam ni lah!”

Pawwww!!!

Dihambatakan sidin tapih nang diulah tangkuluk tadi. Pas kana dahi tacut pasar.

Dabuk!!! 

Mandabuk si tacut pasar tahumbaling, langsung siup kada sing garakan lagi.

Lalu abut ai urang sapasaran, Umbuy mangalahakan tacut pasar iwak sakali hambat haja wan tapih. Warrrbyasahhh, ujar kakanakan wayahini.

BACA JUGA :  Iguana

Lihum Umbuy urang pasar garunuman mamandirakan sidin, kagum wan kasaktian tapih Umbuy.

”Uuuuy, paraya ah pina mamuji-muji sahimat-himat. Biasa haja, kadada babacaan atawa kasaktian napa-napa,” ujah Umbuy. 

Tatap urang pasar kada parcaya. Musti ada baisian ”pakaian” jua Umbuy ni.

”Tacut tu tadi siup sampai bincul dahi ku kibah wan tapih, kada marga sakti pang. Marganya, pas handak ku hambatakan, ku andaki dacing nang sakilu di dalam tapih,” takunjihing Umbuy bakisah.

Balalu daraw ai urang tatawaan mandagar papacahan tapih sakti si Umbuy.***

Kamus:

  • Panambayan (Banjar Pahuluan); Pamulaan = Kali pertama.
  • Paiwakan = Pedagang ikan (profesi).
  • Sutil = Remeh, cetek.
  • Cuk (isitilah) = Jatah preman/uang keamanan.
  • Arian = Kala/saat/waktu (tergantung konteks, bisa juga bermakna ”hari” bila diletakkan sebelum nama hari).
  • Hirdir = Herder (merk pisau).
  • Urak; baurak = Buka; membuka (dalam konteks kalimat diatas, bermakna ”menggelar dagangan”).
  • Satuyuk = Ukuran banyaknya barang dagangan. Bisa diartikan sebagai “setumpuk” tapi dalam jumlah sedikit.
  • Salian (Banjar Pahuluan) = Dan juga.
  • Magin = Semakin.
  • Daham (Banjar Pahuluan) = Jangan.
  • Damiya; kadamiya (Banjar Pahuluan)/kaya ini (Banjar Kuala) = Begini/seperti ini.
  • Rahatan = Sedang (mengerjakan).
  • Dipahawai = Diremehkan.
  • Karihit = Mengerut.
  • Tangkuluk = Penutup kepala wanita dari sarung yang dililitkan sedemikian rupa.
  • Bungul; kabubungulan = Bodoh; sangat bodoh.
  • Diaku (Banjar Pahuluan) = Aku.
  • Mandabuk = Gedebuk (benda berat jatuh).
  • Tahumbaling = Terjengkang.
  • Lihum = Tersenyum.
  • Paraya (Banjar Pahuluan); kada usah (Banjar Kuala) = Jangan/tidak usah.
  • Sahimat-himat = Terlalu/dengan sangat.
  • Kibah = Kibas.
  • Marga (Banjar Pahuluan) = Sebab/karena.
  • Daraw = Tertawa bersama-sama.

Norsiwan, tinggal di Birayang, HST

BACA JUGA :  Salingkuh

Tinggalkan Balasan

Alamat email Anda tidak akan dipublikasikan. Ruas yang wajib ditandai *

Next Post

Sebelum Raperda Disahkan, Pemkab Barsel Diminta Tidak Memungut Pajak Retribusi Daerah

Jum Jan 19 , 2024
"Saat ini Raperda tentang Pajak dan Retrebusi Daerah yang telah diparipurnakan pada 12 Januari lalu, telah diajukan ke Kementrian melalui Gubernur Kalteng untuk dievaluasi"

You May Like

TABIRklip