Iguana

Oleh: AR Muchlison

ARIAN tu, Ijai handak tulak mambarasihi bidakan ampunnya di parak kampus JFOK Banjarbaru. Kisahnya ni, si Ijai tu ti bos bidakan. Sidin banyak baisian bidakan gasan disiwaakan ka lawan mahasiswa nang sakulah di JFOK.

Babaya handak tulak, tang handak bakamih ha si Ijai nih. Mahancap ai sidin bapacul salawar, lalu masuk ka WC pribadi di dalam kamar. Han, inya kaya itu sanak ai, urang sugih tu baisian WC khususan di kamar.

Tuntung bakamih, abut Ijai mancari’i salawar simpak, maka kadada.

”Haw, ajin ai disimpani hantu simpak ku nih,” Ijai gagarunum. ”Asa’an ti hanyar ha ku pacul,” bagaru kapala Ijai mamikirakan.

Dipariksa ka higa lamari, kadada. Diugainya salimput, bantal wan guguling kalu pina tatindih, kadada jua. Sampai bajungging Ijai malihati ka bawah ranjang, kadada jua. Asa mawah banar si Ijai.

Asa kalawasan bacacari, Ijai kada jadi basimpak. Inya mamuruk salawar handap haja, imbah tu balapis wan salawar panjang. Lalu, tulak lah Ijai basapida mutur ka JFOK matan Jalan Pinus II manambus ka Jalan Komet.

Hampai di Komet, ada kakanakan basapida mutur metik ganal, pina gamat wan pina mananangah bakandaraan. Ditiring-tiring Ijay matan balakang, pina kadada handak ka pinggir atawa balaju.

Pas di muka Kantor Kelurahan Mentaos, balaju Ijai, disalipnya kakanak nintuh. Nyurrrr, mangunyur Ijai mang-gas kandaraan.

Sakalinya, kakanak nintuh balaju jua mang-gas kandaraan, tagasnya handak manyalip Ijay. Indah kalah, hancap Ijay mamulas gas.

Parak tikungan ka Jalan Mentaos, kakanak tadi mambunyiakan klakson sing hangkuyan. Napa wahana nih, ujar Ijay dalam hati. Lalu inya bagimit saikit.

Imbah tapaimbai, lalu kakanak tadi baucap, ”Julak, ada simpak sangkut di bahu pian!”.

Takajut Ijai, mangulih ka bahu. Piasat am, ujar Ijai dalam hati, pacah rumus.

Sakalinya pas rahatan handak bakamih di rumah tadi, Ijai kada ingat manyangkutakan simpak ka bahu. Mandayi tuhuk bakikihan di kamar kada tadapat, sakalinya ”ikungnya” mancungkung di bahu.

Kakanak tadi asa mawah jua malihat. Nang kabiasaan urang mambawa Iguana di bahu rahatan bakandaraan. Urang tuha nginih maka simpak nang diandak. Takarinyum kakanak tadi sambil mamulas gas.***

Kamus:

• Bidakan = Rumah petak/kost.
• Babaya = Ketika.
• Tang = Semacam imbuhan bermakna tiba-tiba/secara mengejutkan. Contoh: tang cungul ha (tiba-tiba muncul).
• Ajin = Mungkin.
• Garunum; gagarunum = Menggerutu.
• Ugai; diugai = Dibongkar/mengeluarkan barang dari suatu tempat.
• Jungging; bajungging = Nungging/menungging.
• Mawah = Bingung/heran.
• Cari; bacacari = Cari/mencari-cari.
• Tangah; mananangah = Tengah; berada di tengah.
• Matan = Dari.
• Mangunyur = Berlalu.
• Tagas; tagasnya = Seperti/sepertinya.
• Indah = Tidak mau.
• Hancap = Segera/dengan cepat.
• Sing = Semacam imbuhan, bermakna sangat.
• Hangkuy (Banjar Pahuluan) = Nyaring/bersuara keras.
• Imbai; tapaimbai = Sama-sama/sejajar/berdampingan/bersisian.
• Piasat = Keadaan yang tidak diinginkan, sial.
• Pacah rumus = Kiasan, suatu keadaan diluar dugaan.
• Rahatan = Sedang/saat.
• Mandayi (Banjar Pahuluan) = Pantas saja.
• Karinyum; takarinyum = Tersenyum kecut.