RANTAU (TABIRkota) – 130 calon haji (calhaj) matan Kabupaten Tapin, Kalimantan Selatan (Kalsel) akhirnya tulus jua naik haji imbah mahadang 14 tahun.
Kada gagampangan, 14 tahun mahadang matan bubuhan sidin dapat porsi keberangkatan arian Desember 2011 bahari, hanyar tahun dudi di 2026 tulus tulak haji.
Kepala Seksi (Kasi) Penyelenggaraan Haji dan Umrah, Kementrian Agama (Kemenag) Tapin, Salmiah Rajebi arian minggu samalam mamadahakan, 130 calhaj tadi sudah dikumpulakan.
“Bubuhan calhaj kami suruh malangkapi barkas administrasi nangkaya paspor, rekening pelunasan biaya haji wan parsiapan teknis nang lain jua,” ujar sidin.
Ujar sidin, dari 130 calhaj tu ti, 126 urang tulak sasuai numur urut kursi wan ampat urang tamasuk kataguri lajut usia atawa lansia.
“Lamunnya masalah tambang tulak haji atawa Ongkos Perjalanan Haji (ONH), masih mahadang kapastian matan pemerintah pusat,” ujar sidin.
Lamunnya ada calhaj nang masih baluman tapi paham, ujar sidin, Kemenag Tapin hudah jua mambuka Ruang Konsultasi gasan batatakunan.
“Bubuhan calhaj tadi, tulaknya kaina bagabung wan Kloter BDJ 07 Emberkasi Banjarmasin, baimbayan wan calhaj matan Balangan wan Banjarbaru,” ujar sidin.
Totalnya barataan nang tulak, labih pada 400 urang, tamasuk wan patugas. (ra)
Kamus:
Tulus = Akhirnya.
Imbah = Setelah.
Kada gagampangan = Tidak Mudah.
Tambang = Ongkos/Biaya.
Batatakunan = Bertanya/Konsultasi.
Baimbayan = Berbarengan/Sama-sama.
